gistihús á Kirkjubóli við Steingrímsfjörð, Strandir

Umhverfisstefna Ferðaþjónustunnar á Kirkjubóli

Ferðaþjónustan Kirkjuból leitast við að kynna umhverfi, náttúru og dýralíf, sögu og menningu á staðnum og í nágrenni gistihússins fyrir gestum:

Bæklingur um sögu, umhverfi og nágrenni Kirkjubóls er aðgengilegur á 3 tungumálum í gistihúsinu.
Saga og umhverfi er kynnt á vefsíðu á 3 tungumálum.
Æðarvarp í Orrustutanga og teistuvarp á Langatanga er aðgengilegt gestum á Kirkjubóli og gefnar leiðbeiningar um umgengni við það.
Sögu- og upplýsingaskilti, örnefnaskilti, borð og bekkir, merkt gönguleið o.fl. gera umhverfið aðgengilegra.
Skotveiði er með öllu bönnuð í fjörunni á Kirkjubóli og í landhelgi jarðarinnar á sjó og óheimilt að skjóta að sel og fuglum. Rjúpa er einnig alfarið friðuð í landi Kirkjubóls. Myndatökur eru hins vegar leyfðar.
Ferðaþjónustan Kirkjuból stendur fyrir sérstöku átaksverkefni til að kynna náttúru Stranda, Náttúrubörn á Ströndum, í samvinnu við Sauðfjársetur á Ströndum. Í því felst margvísleg miðlun á fróðleik um umhverfi og náttúru, einnig viðburðir tengdir náttúruskoðun og útivist, og umhverfisbætur á jörðinni Kirkjubóli.
Stuðlað er eftir megni að verndun náttúru og menningarminja á Kirkjubóli og á Ströndum og Vestfjörðum öllum.
Ferðaþjónustan Kirkjuból styður dýra- og náttúruvernd á Vestfjörðum og landsvísu, friðlýsingu náttúruvætta og sögustaða, stofnun verndarsvæða, friðlanda og þjóðgarða.
Ferðaþjónustan Kirkjuból styður markvissa þátttöku sveitarfélagsins Strandabyggðar og annarra vestfirskra sveitarfélaga í Staðardagskrá 21 - sjá Staðardagskrá fyrir Strandabyggð. Stutt er við allar fyrirætlanir Sorpsamlags Strandasýslu um flokkun sorps og fagleg vinnubrögð.

Ferðaþjónustan Kirkjuból vinnur markvisst að því að halda nánasta umhverfi hreinu og aðlaðandi:

Tekið er saman plastrusl í fjörunni tvisvar sinnum á ári og oftar ef þörf krefur og því skilað í sorpgám.
Farið er með vegi tvisvar á ári og týnt rusl.
Þess er gætt að drasl, spýtur og járn, liggi hvergi á víð og dreif í landareigninni eða að ruslahrúgur hlaðist upp við veggi útihúsa.
Girðingar sem ekki eru ónýtar og ekki er þörf fyrir eru teknar niður og fjarlægðar.
Rekaviðarstöflum og rekadrumbum í fjöru er leyft að halda sér, enda mikilvægur hluti af ímynd Stranda og staflarnir búsvæði teistunnar.
Leitast er við að halda ásýnd húsakosts á jörðinni þokkalegri, eftir efnum og ástæðum hverju sinni.
Efnistaka er leyfð á tveimur stöðum í landi Kirkjubóls þar sem hefð var fyrir efnistöku þegar núverandi ábúendur keyptu jörðina. Ekki verða opnaðar nýjar námur og töku efnis við ós Miðdalsár er stillt mjög í hóf. Nágrannabændur fá einnig sand í sandkassa, kattakassa og sandgryfjuna á íþróttavellinum við Sævang úr sandfjöru innan við Innri-Tanga.

Í starfi sínu leitast Ferðaþjónustan Kirkjuból við að nota umhverfisvænar lausnir:

Notað er umhverfisvottað þvottaefni og uppþvottalögur.
Sparperur eru notaðar þar sem hægt er að koma því við.
Leitast er við að halda jöfnum hita í gistihúsnæðinu og spara orku.
Fráveitumál og vatnsból eru til fyrirmyndar.
Vörur og þjónusta úr heimabyggð eru valdar sé þess kostur vegna framboðs og verðlags, einnig ráðið starfsfólk úr heimabyggð ef þörf er á slíku.
Notkun á pappír er meðvituð og útprentun takmörkuð.
Rafhlöðum, dagblöðum, gleri, plasti, áli og járni, er safnað og skilað til endurvinnslu og eyðingar eftir því sem við á.
Unnið er með öðrum fyrirtækjum á svæðinu að umhverfismálum, stefnumótun, kynningu og fræðslu, eftir því sem færi gefast.
Akvæðum laga og reglugerða um umhverfismál er fylgt og reksturinn háður eftirliti, úttektum og starfsleyfi frá Heilbrigðiseftirliti Vestfjarða.