Meistaramót í hrútadómum 2006 fór fram á Sauðfjársetrinu sunnudaginn 27. ágúst. Mikið var um dýrðir og veðrið hélst þokkalegt á meðan mótið fór fram, en keppnin fór fram í skjóli við húsvegginn í Sævangi. Fjöldi keppenda sem margir voru langt að komnir mættu til leiks og hefur þátttaka sjaldan verið betri í flokki þeirra sem eru vanir hrútadómum. Það var Strandamaðurinn Kristján Albertsson á Melum í Árneshreppi sem bar sigur úr býtum á mótinu eftir harða keppni, því alls voru sex sem fundu út réttu röðina á hrútunum miðað við mat yfirdómnefndar undir stjórn Jóns Viðars Jónmundssonar. Í öðru sæti í flokki þeirra sem gáfu hrútunum stig og eru vanir hrútaþuklarar varð annar Strandamaður, Guðbrandur Björnsson á Smáhömrum í Tungusveit, en þriðji varð Úlfar Sveinsson úr Skagafirði.

Í flokki þeirra óvönu sigraði Sigurður Sigurðarson dýralæknir sem hafði röðina rétta og óvenju snjallan rökstuðning. Dómnefnd taldi að vísu álitamál hvort Sigurður hefði keppt í réttum flokki, en hann fullyrti að hann kynni ekkert í stigakerfinu og væri alsendis óvanur að þukla lifandi hrúta, þó hann hefði vissulega skoðað innyflin í allmörgum slíkum. Sigurður brá síðan á leik og flutti vísur sem hann hafði ort á meðan á skemmtuninni stóð við verðlaunaafhendinguna, en hann var á ferð með Kvæðamanna-félaginu Iðunni á Ströndum í tengslum við Landsmót hagyrðinga. Nærvera félagsmanna setti mikinn svip á viðburðinn í Sævangi. Í öðru sæti í flokki þeirra óvönu varð Alda Ýr Ingadóttir á Kaldrananesi á Ströndum sem er 11 ára og sú þriðja varð Sólrún Ósk Pálsdóttir sem er 6 ára.

Jón Viðar Jónmundsson, dómnefndarformaður, mættur til leiks.

Brandur á Bassastöðum tvínónar ekki við þuklið, Jón Vilhjálmsson heldur í hrútinn.

Sverrir Guðbrandsson tekur lagið ásamt vænum Strandahrút frá Heydalsá.

Kristján Albertsson á Melum tekur á hrútnum, Guðbrandur á Smáhömrum párar niður stigagjöfina.

Óþekktur eldri maður spjallar við Sverri Bassa (eða hrútinn) um daginn og veginn.

Það er tilvalið að leika sér í Sauðfjársetrinu, hvort sem er í barnahorninu eða úti á Rannveigu.

Hrútastigun krefst rækilegrar umhugsunar - og þá er gott að hafa eitthvað til að geyma skriffærin á.

Óþekktur aðili úr Kvæðamannafélaginu Iðunni fylgist með þuklinu.

Það er ekki úr vegi að skella sér á bak - svona fyrst það er hægt á annað borð.

Jón Stefánsson stórbóndi og eðalhrútaræktandi á Broddanesi þuklar af krafti.

Stefán Snær Ragnarsson, ungbóndi á Heydalsá, heldur í Skara vin sinn.

Tilkynnt um sigur Sigurðar Sigurðarsonar í flokki óvanra þuklara. Stjórn Sauðfjársetursins, formaður dómefndar og Sigurður sjálfir hafa bersýnilega gaman af.

Topp 3: Guðbrandur á Smáhömrum í 2. sæti, Kristján á Melum í 1. sæti og Úlfar úr Skagafirði í 3ja.

Sigurvegurum klappað lof í lófa.

Ljósm. Kristín Sigurrós Einarsdóttir og Jón Jónsson