Sauðfjársetur á Ströndum

Sauðfjársetrið er skemmtilegt safn með fjölbreytta afþreyingu fyrir alla fjölskylduna. Það er staðsett í félags-heimilinu Sævangi rétt sunnan Hólmavíkur við veg nr. 68, örskammt frá vegamótunum við veg nr. 61 yfir Arnkötludal.

Fastasýning Sauðfjársetursins ber heitið Sauðfé í sögu þjóðar, en umfjöllunarefni hennar er sauðfjárbúskapur frá öllum mögulegum og ómögulegum hliðum. Meðal þátta sem sýningin fjallar um eru t.d. sauðburður, heyskapur, jarðvinnsla, túnrækt, sauðfjársjúkdómar, mörk og eyrna-merki, afurðir, sláturtíð, smalamennska, réttir, ullarvinnsla, fjárhús, hættur sem steðja að sauðkindinni og margt fleira.

Sýningin er opin frá 12:00-18:00 alla daga yfir sumarið, en einnig er hægt að fá hana opnaða yfir veturinn með því að hringja í síma 661-2009 eða senda póst í netfangið saudfjarsetur@strandir.is. Hópar eru hjartanlega velkomnir á sýninguna og auðsótt er að leigja Sævang undir hvers kyns fundi, veislur, námskeið eða aðrar samkomur.

Auk sýningarinnar er kaffistofan Kaffi Kind í Sævangi og einnig sölubúð með handverki og minjagripum.

Eitthvað fyrir alla

Mikil áhersla er lögð á að ungir sem aldnir finni eitthvað við sitt hæfi á safninu. Þar er litríkt og skemmtilegt barnahorn með leikföngum og skemmtilegu dóti, aðstaða til að lita og föndra og einnig er þar lítið vísindahorn þar sem fræðimennirnir í fjölskyldunni geta skoðað alls kyns hluti í víðsjá.

Gestir Sauðfjársetursins upplifa sýninguna í gegnum öll skilningarvitin. Þar má nefna hlut eins og hrútabandið sem angar gríðarlega af fyrri notendum. Ef vel er hlustað inni sýningunni má heyra stjákl og einstaka jarm. Það er líka hægt að prófa einstaka hluti á sýningunni - t.d. er hægt að kveikja á rafmagnsklippum, athugað þyngdina í kindavigt eða stimpla sig með vel völdum stimpli í sláturhúsinu.

    

Uppbygging sýningarinnar

Gamlir og nýjir munir sem tengjast sauðfjárbúskap eru að sjálfsögðu þungamiðja sýningarinnar. Hún inniheldur einnig mikinn texta um sauðfjárbúskap og hver einasti hlutur og ljósmynd er merktur með útskýringu á íslensku og ensku. Mikil vinna var lögð í gerð textanna og leitast var við að hafa þá líflega og skemmtilega, en um leið faglega unna.

Annað einkenni á sýningunni er mikill fjöldi ljósmynda, en þær sýna vel hversu fjölbreytt og margbrotið starf sauðfjárbænda er. Myndunum er reglulega skipt út og reynt er að hafa uppi myndir sem vekja gleði og áhuga gesta á viðfangsefni safnsins.        

Texti sýningarinnar er fáanlegur á ensku og þýsku í afgreiðslu safnsins. Einnig er hægt að kaupa fræðsluhefti í handverksbúð setursins sem inniheldur allan texta og úrval ljósmynda í eigu safnsins.


Heimalningar og önnur dýr

Vinsælustu sýningargripirnir yfir sumartímann eru reyndar ekki staðsettir innandyra uppi á vegg, heldur eru þeir venjulega á vappi úti að bíta gras og skemmta sér við gestakomur. Þetta eru að sjálfsögðu heimalningarnir, en Sauðfjársetrið hefur á hverju sumri haft móðurlaus lömb í fóstri frá því snemma í júnímánuði.

Heimalningunum er gefin mjólk úr pela með aðstoð gesta sem í heimsókn eru hverju sinni. Það er skemmtileg iðja og margir fullorðnir hafa líka rifjað upp takta frá því þeir voru í sveit í gamla daga auk þess sem börnin hafa mikið gaman af því að sjá þá drekka og spreyta sig á að halda á pela. Áfergjan er oft mikil og menn mega hafa sig alla við til að fullnægja drykkjuþörf lambanna.

Sauðfjársetrið hefur einnig oftar en ekki haft hænur í fóstri yfir sumarið. Þá er einnig hægt að skoða æðarkollur liggja á hreiðrum sínum á Orrustutanga framyfir miðjan júní og í Kirkjubólsfjöru rétt við safnið er gríðarlega fjölbreytt fuglalíf. Svæðið þar er tilvalið til gönguferða. 

     +++++++

Það er sjálfseignarstofnunin Sauðfjársetur á Ströndum ses. sem rekur safnið árið um kring. Það á einnig og rekur geymslu-, skrifstofu- og verkstæðis-húsnæði að Skeiði 3 á Hólmavík. Framkvæmdastjóri Sauðfjársetursins síðan haustið 2006 er Arnar Snæberg Jónsson frá Steinadal í Kollafirði. Stjórnarmenn eru: Matthías Lýðsson, bóndi í Húsavík, formaður, Sverrir Guðbrandsson, frá Bassastöðum, gjaldkeri og Reynir Björnsson, bóndi í Miðdalsgröf, ritari.

Félag áhugamanna um Sauðfjársetur á Ströndum er starfrækt sem hollvinasamtök safnsins.
Hér er hægt að fræðast nánar um starfsemi félagsins.

+++

Sauðfjársetur á Ströndum ses. - saudfjarsetur@strandir.is
© 2007 Sauðfjársetur á Ströndum