Nokkur verkefni:  
 

Söfn og sýningar: 

&

Söfn og sýningar í Eyjafirði
Sögusmiðjan vann á árinu 2002 úttekt á minjasöfnum og sýningum í Eyjafirði fyrir Héraðsnefnd Eyjafjarðar.

Sauðfjársetur á Ströndum
Sögusmiðjan sá um hugmyndavinnu, hönnun og uppsetningu á sögusýningunni Sauðfé í sögu þjóðar fyrir Sauðfjársetur á Ströndum sem opnaði 2002. Sjá nánar um þetta skemmtileg verkefni á  vef Sauðfjársetursins.

Galdrasýning á Ströndum
Á Hólmavík í Strandasýslu hefur fyrsti áfangi Galdrasýningar á Ströndum verið opnaður - það var vorið 2000 og nú fimm árum síðar hefur Galdrasýningin líka opnað Kotbýli kuklarans á Klúku í Bjarnarfirði. Galdraaýningin hefur vakið mikla og verðskuldaða athygli og fjöldi manna hefur litið við í safnhúsinu. Hér er á ferðinni vegleg sögusýning um þjóðtrú, galdra og galdramenn, sem Sögusmiðjan hefur tekið þátt í uppbyggingunni á með fjölmörgum öðrum. 

Hákarlaveiðisýning á Reykjum
Á safnadaginn 8. júlí 2001 var opnuð ný sýning um hákarlaveiðar við Húnaflóa í Ófeigsskálanum í Byggðasafninu á Reykjum í Hrútafirði. Sögusmiðjan vann að hönnun og uppsetningu sýningarinnar. Á safninu á Reykjum eru margir merkisgripir tengdir hákarlaveiðum og þeirra merkastur er án vafa hákarlaskipið Ófeigur frá Ófeigsfirði á Ströndum sem er stolt safnsins.

Safnahúsið í Borgarnesi
Vorið 2001 vann Sögusmiðjan að uppsetningu nýrrar sýningar í Safnahúsinu í Borgarnesi. Á sýningunni er fjallað um skógarnytjar fyrr á tímum.

Þorskastríðin og varðskipið Þór
Sögusmiðjan setti í byrjun árs 2000 upp sýningu um þorskastríð Íslendinga og Breta um borð í veitinga- og söguskipinu Thor. Jafnframt er fjallað um sögu skipsins sem er víðfrægt sem gamla varðskipið Þór sem smíðaður var 1951 og tók virkan þátt í öllum deilum Íslendinga og Breta vegna útfærslu landhelgi og fiskveiðilögsögu. Síðar var skipið í eigu Björgunarskólans og hét þá Sæbjörg.

Stríðsárasafnið á Reyðarfirði
Sögusmiðjan gerði 1999 ítarlega úttekt á starfi safnsins og vann fyrir það framkvæmdaáætlun fyrir næstu ár. Íslenska Stríðsárasafnið er staðsett í Spítalakampinum á Reyðarfirði, en víða um fjörðinn gefur að líta minjar frá þessum tíma  loftvarnabyrgi, fallbyssustæði, braggagrunna o.s.frv.

Sjávarskrímsli úr Suðurhöfum
- Skjaldbökuævintýrið 1963 -
Sumarið 1998 var sett upp allsérkennileg sýning í Upplýsingamiðstöð ferðamála á Hólmavík. Þar voru sýndar jarðneskar leifar risaskjaldböku (370 kg), sem sjómaðurinn Einar Hansen fann á reki á Steingrímsfirði haustið 1963, blaðaúrklippur og myndir frá því er skjaldbakan var dregin á land. Sýningin var fjármögnuð með sölu á skjaldbökusúpu og póstkorti af Einari á baki Skjöldu.

Ferðaþjónusta og menningarverkefni: 

&

Upplýsingamiðstöðin á Hólmavík
Sögusmiðjan tók að sér rekstur og gæðaþróun á Upplýsingamiðstöðinni á Hólmavík með samningi við Hólmavíkurhrepp vorið 2003. Síðan hefur allmikil vinna verið í gangi við þróun á rekstri miðstöðvarinnar.

Grettistak í Húnaþingi vestra
Í september 2001 var skrifað undir samstarfssamning Sögusmiðjunnar og stýrihóps um Grettisverkefni í Húnaþingi vestra. Skýrslu var síðan skilað í ársbyrjun 2002. Í henni var heilmikil hugmyndavinna og tillögur um framkvæmdir í tengslum við viðamikið menningar- og ferðaþjónustuverkefni sem kallast Grettistak. Verkefnið byggist á Gretti sterka Ásmundarsyni og sögustöðum honum tengdum í Húnaþingi vestra og reyndar víðar um land.

Lagarfljótsormurinn
Sumarið og haustið 2000 vann Sögusmiðjan hugmyndavinnu um hvernig hefja megi þekktasta vatnaskrímsli landsins, Lagarfljótsorminn, til frekari vegs og virðingar. Jafnframt var skoðað hvernig og hvort takast mætti að gera hlut hans í ferðaþjónustu á Fljótsdalshéraði meiri og hvernig slíkt verkefni gæti komið sem flestum að notum og haft sem víðtækust jákvæð áhrif fyrir heimamenn og gesti.

Ferðaþjónusta til framtíðar
Þróunarverkefni á vegum Iðntæknistofnunar 1997-99, þar sem Sögusmiðjan sá um kennsluefnisgerð og kennslu um notkun þjóðmenningar og sögu í ferðaþjónustu. Verkefnið snérist annars að miklu leyti um umhverfisstefnu og vistvæna ferðaþjónustu. Verkefnisstjóri var Jón Ágúst Reynisson, landfræðingur hjá Iðntæknistofnun, en fyrirtæki sem tóku virkan þátt í verkefninu voru alls 30.

Sagnareki - Sögustaðamerkingar á Ströndum
Á Ströndum hefur verið unnið að merkingu á þjóðsagnaslóðum og sögustöðum síðustu árin. Sögusmiðjan hefur komið að verkefninu, en Héraðsnefnd Strandasýslu stóð fyrir átakinu og það var styrkt af Umhverfissjóði verslunarinnar. Nú er áhugi fyrir að átakið nái um alla Vestfirði og hefur Dorothee Lubecki ferðamálafulltrúi Vestfjarða yfirumsjón með vinnunni.

Ferðaþjónusta og þjóðmenning
Átaksverkefni í ferðaþjónustu á Ströndum sem hófst árið 1995 og lauk 1998.  Héraðsnefnd Strandasýslu stóð fyrir verkefninu, en vinnan við það fékk Nýsköpunarverðlaun forseta Íslands árið 1996. Það var m.a. styrkt af Nýsköpunarsjóði námsmanna, Byggðastofnun og Samgönguráðuneyti.

Bókaútgáfa og fleira

Strandir - jarðalýsingar og ábúendatöl
Í vetur kemur út ritið Strandir, en þar er fjallað um jarðir og ábúendur í Strandasýslu síðustu árin. Bókin hefur verið alllengi í smíðum.

Kynjakarlar og skringiskrúfur
Á vordögum 2000 var útvarpað á Rás 1 sex útvarpsþáttum um förumenn á Íslandi. Sagðar voru sögur og fjallað um efnið frá margvíslegum hliðum. Þættirnir voru unnir í samvinnu Sögusmiðjunnar og Rósu Þorsteinsdóttur þjóðfræðings sem starfar á Stofnun Árna Magnússonar. Þáttagerðin var styrkt af Menningarsjóði útvarpsstöðva. Þættirnir voru endurfluttir sumarið 2003.

Þjóðtrú og börn
Haustið 1998 ýtti Sögusmiðjan úr vör viðamiklu langtímaverkefni sem fjallar um þjóðtrú og barnamenningu. Verkefnið miðar að því að kynna íslenskan þjóðtrúarheim fyrr og nú fyrir börnum og unglingum, og einnig snýst það um rannsókn á barnamenningu og þjóðtrú. 

Vefsíður

Vestfjarðavefurinn
Viðamikill og glæsilegur vestfirskur upplýsingavefur sem opnaður var formlega í maí 2000. Þar er fjallað um menningu og mannlíf, ferðaþjónustu og sögu á Vestfjörðum. Sögusmiðjan vann vefinn fyrir AtVest og sér um rekstur hans. 

Héraðsbókasafn Strandasýslu
Vefur sem opnaður var haustið 2003 í tengslum við markaðsátak bókasafnsins.

Upplýsingamiðstöðin á Hólmavík
Þegar Sögusmiðjan tók við rekstri Upplýsingamiðstöðvarinnar á Hólmavík vorið 2003 var gerður lítill vefur til að kynna miðstöðina.

Leikfélag Hólmavíkur
Í ársbyrjun 2003 var opnaður vefur Leikfélags Hólmavíkur - langflottasti vefur áhugaleikfélags á landinu.

Sauðfjársetur á Ströndum
Sögusmiðjan gerði vefsíðu Sauðfjársetursins. 

Strandir.is
Sögusmiðjan á og rekur lénið www.strandir.is. Þar er fréttavefur  fyrir Strandasýslu ásamt ýmsu öðru.

Ferðaþjónustan Kirkjuból
Sögusmiðjan bjó til vef fyrir Ferðaþjónustuna Kirkjuból vorið 2001 og hefur séð um viðhald hans síðan. Þar er gistihús með 5 herbergjum. Á Kirkjubóli er lögð áhersla á fjölskylduvæna ferðaþjónustu. Þar hefur verið unnið að útivistarsvæði í fjörunni og útbúið leiksvæði fyrir börnin og hús fyrir þau að leika sér í.

Vefur Byggðasafnsins á Reykjum
Nýr vefur Byggðsafnsins á Reykjum var opnaður vorið 2001. Sögusmiðjan sá um vefsíðugerð, en á vefnum er fjallað um safnið og ýmsa gripi þess, uppákomur og viðburði. Þá gerð grein fyrir áherslum í starfi Byggðasafnsins og framtíðaráformum.

Hólmavíkurhreppur
Vefur Hólmavíkurhrepps var opnaður um áramótin 2000/2001. Þar eru meðal annars upplýsingar um sögu sveitarfélagsins og starfsmenn, fundargerðir hreppsnefndar og margar myndir af mannlífi. Sögusmiðjan sá um vefsíðugerð og textagerð að mestu leyti.